الاهتمام والحب

الحب اهتمام واحتواء وحنية ودلع وتفاني وتفنن في اسعاد الشخص الآخر.. لو الحاجات دي مش موجودة يبقى مفيش حب 

الاهتمام والحب الاثنين مينفعش ينفصلوا عن بعض ولو حاجه جت من غير الثانية متكملش العلاقة

الاهتمام ممكن يكون  كلمة حلوه كيس شيبسي شكولا بوكية ورد كلها حاجات صغيرة ممكن يكون لمسة أيد كلها حاجات صغيرة بس بتفرق مع أي بنت .

ازاى ترضى بعلاقة ناقصة حاجه ولو  الحاجة دى أنتي شيفاها صغيرة ازاى ترضى بكلام وارتباط علشان بس خايفه نظرة الناس ليكى أو خايفه ترفضي ليقولوا طب ما اللي يقول يقول المهم انتى تكوني مقتنعة وتكوني فرحانة بجد

كلنا بنعيش ندور علي السعادة والسعادة ممكن تكون في كلمه في هديه في نظرة عين في لمسة أيد حنينه بيها تحسي انك ملكتي الدنيا متقبليش علاقة ناقصة حته وتقولى هتكمل بعدين او مش مهم المهم اتجوز او ارتبط وخلاص

هترضى بقليل هيقل اكتر ومش هتوصلى للى نفسك فيه وفي النهاية مش هتكونى سعيدة طب ليه المهم انتى .

كلامى مش معناه انك تكونى انانيه بس اهم حاجه في الحب انك تحبى نفسك صح الاول وتعرفى ازاى ترضيها وتعرفى انتى عاوزه ايه علشان يبقى الاختيار صح ودى حكايه وحصلت فعلا وكلنا شفناها  في صورة وكلام الفنانة مني ذكى وزوجها احمد حلمى بتفسر كل كلامى في صورتهم في نظرت عينهم في حبهم لبعض ربنا يخليهم لبعض  ويديم المحبة ليهم .

مني ذكي كانت في برنامج #معكم #منى_الشاذلي  لما قالتلها صورتك انتي و #أحمد_حلمي في حفل #ACA كانت عاملة ضجة جامدة و انها حست ان البنات عندها حرمان عاطفي من كتر التعليقات عالصورة..
منى ردت بمنتهى التلقائية “عشان بيرضوا بحاجات قليلة اوي“.. و بعدين فسرت الرد وقالت مش قصدي مادياً قصدي معنوياً..

فكرت كدة في الرد.. لقيت ان عندها حق!!

احنا ليه نكون في علاقة مش مرتاحين فيها! ليه نتنازل عن حاجات “معنوية” مينفعش نتنازل عنها؟!.. ليه بنقبل قلة الاهتمام وقلة السؤال وقلة الكلام الحلو و قلة المشاعر وقلة كل حاجة معنوية في العلاقة.. 
عن تجربة.. العلاقة اللي بتكون مكتملة معنوياً هي اللي بتحسسك انك عايشة وانك انسانة وانك موجودة حتى لو لا قدر الله مكملتش لاي سبب.. 
انك تحسي باهتمام الشخص و حبه وان عنيه تكون فضحاه زي ما عنيكي فضحاكي دا مهم اوي..
انك تحسي انك رقم ١ في حياته حتى لو مش رقم ١ لان اكيد بيسبقك على الاقل شغله و التزاماته بس بكلمه بيحسسك انك رقم ١..
بنظرة عينه و بلمسة ايده بيحسسك انك اهم حد و اهم حاجة..
الحب مش اتنين مع بعض حتى لو ضاربين بعض بالجزم بس بيحبوا بعض.. 
الحب اهتمام واحتواء وحنية ودلع وتفاني وتفنن في اسعاد الشخص الآخر.. لو الحاجات دي مش موجودة اقسم بالله لو مرتبطة ببراد بيت هتحسي انك مع كوز ذرة محطب ومحروق..
اتنازلي عن اي حاجة الا المشاعر 

مقالات ذات صلة:

• اساسيات العلاقة الزوجية في رمضان تعرف عليها الان
• اسماء للاولاد والبنات جديدة مع المعاني
• الحب افعال وليس اقوال
• حقائق مفزعة
• ماهو المستحيل من وجهة نظرك
• كيف تكون سعيداً
• حوار داخلي مع النفس والروح
• خطوات بسيطة لتجديد الحياة الزوجية