اربع طرق لعمل غسول البشرة بمكونات طبيعية

كلنا عارفين غسول البشرة قد ايه مهم لتنضيف البشرة من اي شوائب او اثار المكياج ده غير انه بيساعد على ترطيب البشرة وبيمنعها من الجفاف لان الصابون العادي بيبوظ البشرة وبيخليها جافة ومافيهاش ترطيب لكن معظم انواع الغسول اللي في السوق فيها مواد كيمائية زي معظم منتجات البشرةهنتعلم في موضوعنا ازاي نعمل غسول البشرة بنفسنا في البيت بمكونات طبيعية وبسيطة ..

الوصفة الاولى:
المكونات:
½ كوباية شوفان.
2 معلقة كبيرة عسل نحل.
1 معلقة صغيرة جوزة الطيب.
10 نقط من زيت اللافندر.
10 نقط من زيت شجرة الشاي.الطريقة:
هنحط الشوفان في الخلاط ونطحنة كويس لحد ما يبقى ناعم خالص وبعدين هنضيف عليه باقي المكونات ونخلطهم كويس مع بعض ونحط الخليط في اي علبة نضيفة عندنا ونستخدمها ندعك بيها البشرة في حركات دائرية لمدة دقيقة وبعدين نغسله بالمياه والوصفة دي تعتبر غسول ومقشر للبشرة في نفس الوقت وممكن يقعد معاكي لمدة اسبوعين والغسول مناسب لكل انواع البشرة..

الوصفة التانية:
المكونات:
1 كوب زيت جوز الهند.
من 1 – 2 معلقة كبيرة فحم “حوالي 5 كبسولات فحم”.
1 معلقة كبيرة صودا الخبز ” الكربوناتو”.
5 نقط من زيت اللافندر.

الطريقة:
هنطحن كبسولات الفحم “هنجيبها من الصيدلية” ونضيف عليها زيت جوز الهند والكربوناتو وزيت اللافندر ونخلط المكونات كلها مع بعض كويس ونحتفظ بيها في علبة ولما نيجي نستخدمه هناخد مقدار معلقة كده ونفرك بيه البشرة لمدة دقيقة وبعدين نغسلها بمياه دافية والغسول ده ممتاز جدا للبشرة زي ما احنا عارفين زيت جوز الهند مفيد جدا للبشرة وبيرطبها والفحم بيساعد على تفتيح البشرة وبينضفها بعمق والغسول ده مناسب لكل انواع البشرة وبشكل خاص البشرة الدهنية..

الوصفة الثالثه:
المكونات:
¼ كوباية زيت جوز الهند.
2 معلقة كبيرة عسل نحل.
5 نقط من زيت اللافندر.الطريقة:
هنخلط كل المكونات مع بعض ونحفظهم في علبة ولما نيجي نستخدمه هنبل البشرة بمياه دافية وناخد من الخليط ندلك البشرة في حركات دائرية لمدة دقيقة وبعدين نغسله بمياه دافية..

الوصفة االرابعه:
المكونات:
3 معالق كبيرة زيت جوز الهند.
معلقة كبيرة عسل نحل.
معلقة كبيرة صودا الخبز “الكربوناتو”.

الطريقة:
هندوب زيت جوز الهند في حمام مياه سخنة وبعدين نضيف عليه باقي المكونات ونقلبها مع بعض كويس وبعدين نحط الخليط في برطمان او علبة ونستخدمه وعادي لو لقتيه اتجمد او بقى شبه الكريم لانه زيت جوز الهند هيتجمد تاني لما نيجي نستخدمه هناخد معلقة منه وندلك بيها البشرة بأطراف الصوابع في حركات دائرية لمدة دقيقة وبعدين نغسل البشرة بمياه دافية وننشفها الغسول ده منظف ومزيل للمكياج ومرطب للبشرة وكمان مقشر مناسب لكل انواع البشرة وخصوصا الحساسة..