اربع وصفات من الخيار لجمال بشرتك

خلاص دخلنا على الصيف والحر والرطوبة والجو ده بيأثر على بشرتنا بطريقة سلبية جدا ومن انسب الحاجات اللي ممكن تستخدميها لبشرتك في الصيف هو الخيار لانه فيه نسبة 90% من المية وده بيدي ترطيب لبشرتنا من جوه ومن بره ..

سكراب الخيار لتقشير الجسم:
المكونات:
 كوباية سكر ابيض.
3/4 كوباية خيار مفروم.
ربع كوباية زيت جوز الهند.الطريقة:
نغسل الخيار و نحطه في الخلاط نفرمه كويس وبعدين نضيف عليه السكر وزيت جوز الهند ونقلبهم مع بعض كويس ونحط الخليط في برطمان ونحتفظ بيه في التلاجة لما نيجي نستخدمة وممكن يقعد في التلاجة لحد اسبوعين ولما تيجي تستخدمية بقى هتاخدي شاور سخن عشان تفتحي مسام البشرة وبعدين هتدلكي جسمك كله بالسكراب في حركات دائرية وتركزي على المناطق الغامقة زي الكوعين والركبتين ..

ماسك الخيار لعلاج حب الشباب:
المكونات:
 معلقة كبيرة عصير خيار.
نص معلقة كبيرة جل الالوفيرا.
5 نقط زيت شجرة الشاي. 3 نقط زيت اللافندر.
2 معلقة كبيرة لبن بودرة كامل الدسم.الطريقة:
هنخلط عصير الخيار وجل الالوفيرا وبعدين نضيف عليهم اللبن بودرة لحد ما تكون عندنا عجينة وبعدين نضيف زيت اللافندر وزيت شجرة الشاي ونخلطهم مع بعض كويس هنحط الخليط على البشرة ونسيبه من 15 ل 20 دقيقة وبعدين نغسله البشرة بمية دافية..

لوشن الخيار لتهدئة البشرة:
المكونات:
 خيارة.
ربع كوباية حليب جوز الهند.
ربع كوباية جل صبار الالوفيرا.

الطريقة:
هنبشر الخيار ناعم ونحطه في مصفي ونضغط عليه عشان نطلع منه العصير بعد كده هنضيف على العصير اللي طلع عندنا علي حليب جوز الهند والصبار ونحط الخليط في ازازة ونرجها كويس عشان نخلط المكونات ونحتفظ بيها في التلاجة لما نيجي نستخدمة عند اللزوم هتجيبي حتة قطن او قماش وتبليها باللوشن وتمسحي بيها بشرتك والمناطق الملتهبة او المحمرة من الشمس هيهديها جدا ..

سبراي الخيار والشاي الاخضر للجسم:
المكونات:
ربع كوباية شاي اخضر.
2 معلقة كبيرة عصير خيار.
معلقة كبيرة جل صبار الالوفيرا.الطريقة:
هنحط الشاي الاخضر في التلاجة نسقعه وبعدين هنضيف عليه باقي المكونات ونحط الخليط في ازازة بخاخ ونرجها كويس عشان نخلط المكونات ونحتفظ بيها في التلاجة لحد ما نيجي نستخدمها وممكن تقعد في التلاجة لمدة اسبوع وممكن بقى ترشي منه على الجسم لو راجعة من يوم شمس وحر خدي شاور وبعدين رشي جسمك بيه..      

مقالات ذات صلة:

• وصفات طبيعية للبشرة من القرفة
• ماسكات العسل الأسود
• اصنعي بلسم جوز الهند واللافندر بنفسك
• فوائد زيت الجوجوبا
• طرق طبيعية وصحية للتخلص من تقصف الشعر
• القهوة علاج للعين
• الموز وفوايده
• سر الكركم وراء نضارة بشرتك